區區狗公園

：琴日阿娘返到屋企，話俾我聽搭車嘅時候，望到個油尖旺狗公園都唔錯噃，雖然地方細細地，區區一個公園仔，但有樹有草有花，我地啲 friend 可以好 free 咁玩。

：對住係嗰區啲兄弟姊妹嚟講，都算係德政噃，值得一讚。

：乜嘢算係呀，直情係德政啦！我地要一齊立正 Solute！聽講，東涌都有個狗公園。不過，有超靚海景嘅灣仔狗公園就摺咗lu。

：吓，灣仔個狗公園摺咗！幾年前聽阿娘講過，有次去同個灣仔區議員傾計，九唔搭八咁都扯咗去講個狗公園。佢返嚟講到眉飛色舞，話氹得個議員鬼咁高興，話一定支持個狗公園攪落去。唉！而家連個公園都無埋添！

：係啦，住喺市區啲狗有時真係同啲過街老鼠無乜分別，連一處可以落腳唞吓嘅地方都無。喂，你而家識多咗咁多朋友，有無識得啲狗識得曾特首呀？

：你懵咗咩，曾特首又唔係彭定康，彭定康就話有威士忌啫，曾特首無拔蘭地架！

：你唔洗咁勞嘈，只不過我諗，如果你有朋友識得佢，就提吓佢，下次訓示啲區議會主席同議員嘅時候，除咗十八區要區區負起建「骨灰龕」嘅責任之外，記得同啲議員講吓，區區都應該要起番個狗公園，先叫得做係一個負責任嘅區議會嚟架！

：哈，諗唔到你成日瞓，瞓到連日唞都喺到發夢！不過，都發得幾有見地噃！